mércores 08/12/21
Os vindeiros 26 e 27 de novembro

NOTICIAS VERÍN | O rural véstese de festa cunha nova edición dos 'Latexos' de Rubén Riós

Rubén Riós co artista vianés Jorge de Álvarez, nun dos eventos da pasada edición de Latexos do Rural.
Rubén Riós co deseñador vianés Jorge de Álvarez, nun dos eventos da pasada edición de Latexos do Rural.

Riós acollerá unha nova edición de Latexos do Rural, que organiza o actor e director local Rubén Riós coa produtora Claqueta Coqueta e a Asociación Cultural da Castaña. Será os vindeiros 26 e 27 de novembro cando se festexen os 15 anos poñendo en valor a cultura no rural coa participación de moitas caras coñecidas, como a presentadora Silvia Jato, a actriz lucense Benedicta Sánchez ou Irene Villa. Tamén as artistas Iria Estévez e Paulinha D´Arzoá; o Bruxo Queiman ou a Charanga Ardores.

Venres, 26 de novembro

O festival dará comezo o venres 26, a partir das 18:30h, no salón de actos de Riós, onde se vai poder visitar unha exposición fotográfica que recollerá toda a traxectoria destes últimos 15 anos. Ás 19:30h, quenda para as mulleres na mesa redonda 'A muller rural creativa', con Benedicta Sánchez, Silvia Jato e Paulinha D´Arzoá.

Ao remate, o amor será o protagonista da man de Eladio e Marina, naturais das Vendas da Barreira e protagonistas dun dos episodios da webserie Arrieiros Somos, que revelarán os segredos dun amor incondicional que xa dura máis de 70 anos. O capítulo coa súa historia será proxectado a continuación.

Para concluír a primeira xornada, emisión en primicia de Outros camiños, un documental de Rubén Riós que versa sobre a historia de superación de persoas con parálise cerebral que conseguen, nada máis e nada menos, realizar o Camiño de Santiago dun xeito diferente pero igual de emocionante.

Sábado, 27 de novembro

Cambio de escenario nesta xornada de festival que se traslada á praza do cruceiro da localidade. Pola mañá, a partir das 11:30h, terá lugar unha 'Ruta do talento', conducida por Silvia Jato e amenizada pola Banda de Gaitas de Pandereteiras de Riós. Haberá cabida tamén para os recoñecementos, coa homenaxe a Benedicta Sánchez, a Irene Villa e ao persoal sanitario do hospital de Verín, rodeados de castiñeiros centenarios. Amenizarán o acto as artistas Iria Estévez e Paulinha D´Arzoá.

Trala sesión vermú e o correspondente pasarrúas, celebrarase un xantar co broche final da coral Cantarela de Riós. Para acudir ao almorzo será requisito imprescindible dispoñer de certificado de vacinación Covid.

Para pechar o evento, pola tarde, celebrarase unha romaría coa música da Charanga Ardores na mesma praza do cruceiro; magosto e queimada tradicional a cargo do Bruxo Queiman.

NOTICIAS VERÍN | O rural véstese de festa cunha nova edición dos 'Latexos' de Rubén Riós
comentarios
Entrando na páxina solicitada Saltar publicidade