Riós convertirase, ista fin de semana, no epicentro do sector da castaña coa celebración do encontro profesional que analizará os retos e as oportunidades que ofrece o aproveitamento dos soutos. Un simposio de carácter técnico e práctico que incidirá no axeitado desenvolvemento das producións, co obxectivo de revalorizalas.
Ourense é a principal produtora galega de castaña, motivo polo que o Inorde organiza o II Foro da Castaña; unha segunda edición que terá lugar no Multiusos de Riós, os días 6 e 7 e outubro, ó ser un territorio cunha gran presenza de soutos. A posta en valor dun sector que pode ser motor do desenvolvemento económico do rural é un dos principais obxectivos do simposio.
O foro está dirixido, fundamentalmente, a produtores, propietarios individuais ou agrupacións propietarias de soutos, empresas privadas e entidades públicas involucradas neste sector. Contará coa presenza de destacados profesionais, con ampla experiencia no aproveitamento e comercialización da castaña, que compartirán os seus coñecementos cos participantes.
Profesionalización e boas prácticas
A xornada do venres, 6 de outubro, centrarase ó longo da mañá nas técnicas para mellorar o aproveitamento das producións. Haberá diversos relatorios nos que se abordarán cuestións como: o tratamento de pragas, a xestión conxunta de soutos, os tipos de plantas de castiñeiro ou a recuperación dos soutos tradicionais.
Xa pola tarde, o foro terá un enfoque máis práctico. Unha exhibición de cociña e repostaría con castaña de Galicia, a cargo da Asociación Cociña Ourense, outra de poda e mantemento do castiñeiro, que impartirán Ricardo Prieto e José Manuel Guerra da empresa Soutogal, e unha conferencia sobre como revalorizar e comercializar a castaña a cargo de Xosé Luis Reza, presidente do Clúster da Comunicación de Galicia.
O sábado, 7 de outubro, realizarase unha visita técnica á comarca do Bierzo para coñecer exemplos de “boas prácticas”. Unha saída que permitirá ver in situ unha nova plantación de castiñeiros con orientación agrícola, en Carracedelo, coñecer á "Agrupación de produtores de venta e comercialización de produto fresco”, de Corullón, así como unha empresa de conxelación de castañas e unha experiencia empresarial familiar de transformación e venda de castaña.