O Centro Cultural Marcos Valcárcel de Ourense acolleu este venres a presentación da XXVIII Feira do Pemento de Oímbra, unha Festa de Interese Turístico Galego que terá lugar o próximo 3 de agosto. Esta localidade de gran tradición vitivinícola celebrará o seu produto estrela: o pemento de Oímbra con Indicación Xeográfica Protexida (IXP).
Un pemento "único" e unha feira con historia
No acto de presentación, o deputado de Representación Institucional, Rosendo Fernández, e a alcaldesa, Ana María Villarino, destacaron as cualidades do pemento. Fernández subliñou que este pemento é "único" polas súas características, como o seu peso e lonxitude (de 100 a 200 g e de 10 a 20 cm por unidade), así como o seu sabor doce e as súas propiedades "cardioprotectoras".
Pola súa banda, Villarino lembrou que esta festa gastronómica, iniciada no século pasado, evolucionou "sen perder a esencia, que é poñer en valor a riqueza da nosa horta". Ademais da IXP do pemento, Oímbra forma parte da Denominación de Orixe (DO) Monterrei, que colabora no evento coa Xunta, Deputación e outras entidades.
Programación para toda a familia
A alcaldesa detallou a programación, que arrancará ás 12:00 horas coa tradicional exposición de pratos cociñados con pemento de Oímbra. Estas creacións, achegadas pola veciñanza de forma voluntaria, serán recompiladas nun receitario colectivo. Ademais, á mesma hora haberá unha mostra de coches antigos e a música da charanga Achicoria ata as 16:00 horas.
A comida popular no pavillón será ás 14:00 horas, e as entradas xa están á venda por 15 euros. No exterior, os visitantes poderán degustar pemento local frito de balde, ademais de polbo, outros alimentos e produtos de artesanía.
Os máis pequenos terán inchables gratuítos durante todo o día, e de 16:00 a 19:00 horas haberá un touro mecánico para a diversión de todos. O broche de ouro da xornada será o concerto do grupo A Roda, ás 21:00 horas e con entrada libre. "Queremos que sexa unha feira para toda a familia, gozando da maridaxe do pemento de Oímbra cunha copa do viño local da DO", concluíu Villarino.
