As cifras de superficie abrasada polo lume sempre teñen controversia e son punta de lanza na discusión entre partidos políticos; e nos incendios forestais de Galicia non ía ser menos. Entre o "cando ti estabas había máis" e a escaseza de datos que transmite a Consellería do Medio Rural existen imaxes do satélite Copernicus -utilizadas para o Sistema Europeo de Información sobre Incendios Forestais (EFFIS)- que amosan cifras de superficie arrasada polos lumes ben diferentes dos datos oficiais estimados. En concreto, 12 593 hectáreas de diferenza. É dicir, o equivalente a algo máis da superficie do concello de Castrelo do Val (122 km²). A Xunta actualizaba esta mañá os datos, tras aumentar a zona dos incendios de Oímbra (sumoulle 2000 ha) e Moialde (Vilardevós); en total: 29 199 ha. Pero as estimacións das imaxes do satélite alcanzan a cifra de 41 792 ha, a día de hoxe.
Medio Rural foi diminuíndo a información da situación dos lumes forestais a medida que ían pasando os días. Se ao comezo había tres entregas diarias de "estimacións provisionais" da superficie afectada, nos últimos días pasaron a ser somentes dúas: unha pola mañá e unha pola noite. Notas informativas nas que podía verse como, a pesar de que os incendios seguían activos ao longo da noite e da madrugada arrasando novas poboacións, os datos "estimados" eran os mesmos na mañá que na noite anterior. A isto temos que sumarlle como ían aparecendo e desaparecendo lumes dos informes; a Xunta decidiu que nas súas notas xa non ían aparecer sempre os lumes extinguidos (Está apagado e coas tarefas de liquidación efectuadas. Non hai lapas e o bordo está frío) ou controlados (Incendio forestal no que se conseguiu deter a súa propagación. Pode haber lapas dentro do perímetro que requiran de labores de liquidación). Tampouco aparecían moitos outros -alomenos ata que se viralizaron nas redes sociais días despois- como foi o caso do que afectou a Pena Trevinca. Isto dificulta coñecer a situación real.
Pouca transparencia informativa nos datos oficias, que -inda que só sexa por ética- teñen a obriga de entregar para informar á cidadanía. Non queda aí a cousa, Medio Rural somentes informa sobre os incendios que afectan a unha superficie de 20 hectáreas ou máis e sobre os que afectan a poboacións e espazos protexidos; e con moi poucos datos. Se en tempos do bipartito gobernando había información clara e precisa sobre lugar, inicio, fin, tipo de lume, medios, superficie e tipo de superficie (raso e/ou arborado) en cada parte diario, dende a volta do Partido Popular ao Executivo galego con Alberto Núñez Feijóo como presidente (2009) comezouse ocultar a información sobre os incendios e lanzar teorías sobre "terrorismo incendiario". Nunha entrevista coa Cadena Ser, a conselleira do Medio Rural, María José Gómez, recoñecía "no que vai de agosto a día de hoxe (18 de agosto) levamos rexistrados 492 incendios só no mes de agosto, é dicir, 370 incendios máis dos que houbo o ano pasado". Sen embargo, neste mesmo tempo, a Xunta somentes informou de 45.
Datos da Xunta de Galicia fronte datos do satélite Copernicus
Entrando no que nos atinxe directamente, os incendios que asolaron as terras da comarca e dos municipios veciños da comarca de Viana, podemos ver a significativa diferenza nas cifras que publica a Consellería do Medio Rural e as que amosa a análise do Sistema Europeo de Información sobre Incendios Forestais (EFFIS) basadas nas imaxes do satélite Copernicus. Lembremos, en total: 12 593 hectáreas de diferenza.
No caso do incendio de Oímbra, que comezara na parroquia da Granxa o pasado martes 12 de agosto, Medio Rural incrementaba onte -logo de varios días sen facelo- a superficie estimada a 17 000 hectáreas. O satélite Copérnicus actualizaba esta mañá a superficie ata as 23 097 hectáreas. A información deste lume tivo o seu aquel ao longo dos días; ao final, a propia Xunta decidiu unilo a "outro rexistrado o pasado venres ás 17.22 horas na localidade ourensá de Xinzo de Limia, Gudín". Este lume foi, sen dúbida, o máis voraz dos que tivemos na raia estos días pasados; afectou aos concellos de Oímbra, Monterrei, Cualedro, Verín, Laza, Castrelo do Val, Xinzo de Limia, Trasmiras e Baltar.
Se nos trasladamos ata o incendio que comezara o mesmo martes 12 na Mezquita, tamén hai diferenza nos datos; inda que non tanta. Medio Rural fala de "10 000 hectáreas en territorio galego" mentres o satélite Copernicus establece 13 185 hectáreas. Este lume afectou aos municipios da Mezquita, A Gudiña e Viana do Bolo en Galicia; así como a territorio da provincia de Zamora.
Vilardevós rematou estos días de terror con tres grandes incendios forestais (aqueles que superan as 500 hectáreas) e un incendio forestal (superficie forestal afectada superior a 0.5 ha arboradas ou de máis de 1 ha se é mestura de raso e arborado). Segue activo o iniciado en Moialde o luns 11, reactivado o xoves 14, e ao que Medio Rural lle otorga arredor de 600 hectáreas; o satélite Copernicus detalla 1936 hectáreas. O que comezara en Terroso o 1 de agosto, declarado como controlado dende o día 4, tamén ten diferente medición de superficie: para a Xunta foron arredor de 570 hectáreas e para o satélite do Sistema Europeo de Información sobre Incendios Forestais foron 1002.
O de Vilardecervos dábase por estabilizado ás 23.44 horas de onte, martes 19 de agosto, cunha superficie afectada de "arredor de 900 hectáreas" segundo Medio Rural e de 2304 segundo Copernicus. Hai que sumarlle os datos do lume que afectou a Fumaces e A Trepa: 100 hectáreas para a Xunta e 239 segundo Copernicus.
E non podemos esquecer as 9 hectáreas do incendio que afectou a Mourazos e das 20 do lume que se iniciaba o luns 18 de agosto en Trasestrada (O Riós). Tampouco podemos esquecer que Medio Rural somentes informa sobre incendios de 20 hectáreas ou que afectan a poboacións e/ou áreas protexidas. Polo tanto, non hai datos oficias da Xunta daqueles incendios forestais inferiores a 20 hectáreas que non afecten a ditas zonas nin dos conatos (inferiores a 1 hectárea (ha) rasa ou 0.5 ha arboradas).
