O Concello de Laza porá en marcha o servizo de Ludoteca de verán durante a tempada vacacional da cativada co obxectivo de facilitar a conciliación da vida laboral e familiar dos veciños e veciñas.
A Ludoteca de verán funcionará dende o 23 de xuño e ata o 1 de setembro, tempo para que a cativada poda ter un ocio de calidade co fío condutor dos valores de respecto, igualdade e desenvolvemento integral da persoa.
O longo período vacacional estival da cativada fai que as familias se atopen cunha situación complicada á hora de atender ás nenas e ós nenos. Por iso, dende o Concello de Laza, ofrecen o servizo de Ludoteca de verán; un espazo que lles permite ás familias conciliar a súa vida laboral co coidado da cativada.
En breve, o Concello de Laza abrirá o prazo de inscrición para poder anotar ós nenos e ás nenas na Ludoteca de verán.
