Levábamos tres anos sen poder gozar da afouteza da cativada nos plenos infantís do Concello de Verín. Ista mañá quedou demostrada a enerxía maila animosidade coas que máis de 120 rapazas e rapaces de 6º da ESO participaron nun acto no que lles fixeron máis de 50 preguntas e suxestións ós membros da corporación municipal de Verín presentes no Auditorio da vila. Algún futuro político escoitouse na sala. Houbo quen pediu explicacións pola falta de pediatras no Centro de Saúde. Mentras, outorgábaselle o título de Alcalde Infantil a Aitor Chamín Oliveira, elexido democráticamente no CEIP Amaro Refojo, e que manterá o cargo ó longo de todo un ano representando á cativada nos actos de carácter infantil que se fagan na vila.
Posto en marcha coa intención de crear unha conexión directa entre o goberno local e os centros de ensino, o Pleno Infantil de hoxe centrouse no debate sobre a igualdade, participando cada un dos centros escolares con argumentacións que viñan preparando hai tempo. O CEIP Amaro Refojo apostou por facer unha compilación de "Frases pola Igualdade", o alumnado do CPR María Inmaculada centrábase na "Igualdade de xénero, igualdade para todos", o CPR Mercedarios elexiu o tema da "Corresponsabilidade" e dende o CEIP Princesa de España chegou unha reviravolta co seu tema "Desmontando a Disney".
Por parte da corporación municipal estiveron presentes: Diego Lourenzo, tenente-alcalde, Emilia Somoza, concelleira de Educación, e Rosario Rodríguez, 2ª tenente-alcalde e concelleira de Persoal. Chegou o tempo dos "Rogos e Preguntas" e no auditorio viviuse un momento de gran algarabía porque todo o alumnado quería participar. Moitas foron as peticións feitas, a meirande parte relacionadas coa mellora do Skate Park, das instalacións deportivas e dos parques da vila. Máis de 50 suxestións e preguntas, non houbo máis porque remataba o tempo xa alongado, que puxeron de manifesto o interese da cativada por mellorar a súa vila e o recoñecemento e implicación ante as necesidades da comunidade en Verín.
Nembargantes, foron outros os temas solicitados con máis ímpetu e razoamentos. Ademáis de reclamar máis pediatras, solicitaron máis carrís-bici na vila ante o perigo que supón para as persoas maiores, pediron que existan máis medios para axudar ás persoas con discapacidade, unha mellora no servizo de recollida do lixo, a ampliación das beirarrúas e o arranxo dos numerosos foxos que hai nas estradas da vila. Non quedou aí a cousa; o alumnado verinés preguntou de que xeito dende o goberno municipal se axuda a que as mulleres teñan as mesmas oportunidades; centrados no tema, os escolares preguntaron polos medios que existen no concello para atender ás persoas que sofren violencia no ámbito familiar ou ós menores que viven situacións de violencia de xénero no fogar.
Membros do Pleno Infantil de Verín 2023, celebrado ista mañá no Auditorio da vila. | FOTOS: Noelia Caseiro.
De esquerda a dereita: Emilia Somoza, Concelleira de Educación, Diego Lourenzo, tenente-alcalde, e Rosario Rodríguez, Concelleira de Persoal, foron os representantes da corporación municipal presentes no Pleno Infantil.
Unha intérprete de língua de signos favoreceu a comunicación cunha das alumnas presentes no Pleno Infantil.
Aitor Chamín Oliveira, novo Alcalde Infantil do Concello de Verín.
Momento no que o novo Alcalde Infantil, Aitor Chamín Oliveira, recollía o bastón de mando das mans de Diego Lourenzo.
Toda a cativada tiña achegas que facer na quenda dos rogos e preguntas do Pleno Infantil.
