Concurridísima celebración deste primeiro de Maio na vila de Verín, e non polas manifestacións do día do traballador, senón pola festividade dos Maios, que congregou a centos de persoas a carón da Praza da Alameda e da Praza García Barbón.
A feira solidaria e a exposición das diferentes elaboracións das asociacións e colectivos participantes propiciaron un ir e vir de persoas nas horas centrais desta mañá. Pero, sen dúbida, foi a Banda do Conservatorio Profesional de Música de Verín a que máis público concitou xa que, como vén sendo habitual, ofreceu un concerto dunha hora que fixo as delicias de todos os presentes.
Antes foi unha pequena representación da Banda Nova Era a que, a carón do "maio" por eles elaborado, tocou algunhas pezas populares. Máis tarde faría acto de presencia a Banda de Gaitas Municipal, logo do seu tamén habitual pasarrúas polo centro da vila cada primeiro de Maio.
Non faltaron, como non, as Coplas dos Maios 2023, na memoria do polifacético Enrique Gómez Pato. Ninguén se foi sen elas e sen aportar os dous euros que irán ás contas solidarias da Asociación Española Contra o Cancro de Ourense.