FOTOGALERÍA | ... E que mellor para honrar ao viño do Val que cunha boa tenreira asada!

Mentres a cultura enchía as paredes do santuario dos Remedios, outro espectáculo tiña lugar a carón das instalacións da vella hípica. Alí, o mestre cociñeiro Karlos Ibarrondo dáballe a volta cada media hora a unha tenreira de 218 kilos en canal que estaba a ser asada polo método vasco "Burduntzi", isto é, a fogo moi lento con carbón vexetal e sempre cun mínimo de doce horas ao lume. 

Foron moitos os que se achegaron a ver como avanzaba o asado e ata algúns tiveron a oportunidade de petiscar parte antes co resto dos comensais. 

Pouco antes das 14:30 horas, chámabase aos asistentes á porta de entrada da carpa habilitada para que fosen tomando asento e desen boa conta dun menú baseado en empanada, leituga e moita, moita e tenra carne de vitela. Previa ao café e á bica do val, música da Fuego Street Band, que tamén amenizou a sesión vermouth. 

Á hora de xantar a choiva respectou aos comensais, coma se dunha maldición divina se tratase cando o foco das actividades estaba dentro do santuario. 

Longa vida a unha "nova" romaría, a do Val do Viño, que malia a treboada de primeira hora da mañá e a pertinaz auga de despois, acabou sendo un éxito de convocatoria á hora do xantar.