A choiva non impediu que as súas Maxestades os Reis Magos de Oriente visitaran as aldeas da bisbarra para levar a ilusión a grandes e pequenos. Con algún cambio de plan de última hora, Melchor, Gaspar e Baltasar percorreron distintas localidades para recibir á cativada e darlles os agasallos que adiantaban a ilusión da noite máis agardada do ano.
En Vilardevós, Melchor, Gaspar e Baltasar camiñaron ao son dos bombos e das gaitas da Escola de Música polas rúas ata chegar á residencia de maiores local e, despois, foron ata a Casa da Cultura para desfrutar da tarde coas nenas e nenos que os agardaban con anhelo. En Oímbra apuraron o paso para ter tempo de visitar cada unha das aldeas do municipio antes de que a choiva fixera acto de presencia; e pararon a falar con todas as persoas que saíron velos, sempre acompañados por Ana Villarino.
A veciñanza de Riós comezou os festexos un día antes coa tradicional homenaxe á tía Pilar nos cantares de Reis en Florderrei; unha xuntanza para lembrar e cantar as melodías do "Cancioneiro das Terras de Riós" de Xosé Lois Foxo. E o domingo, as súas Maxestades Reais pasaron a tarde coa cativada, repartindo alegría e agasallos. A Casa da Viúva da Gudiña foi o lugar onde Melchor, Gaspar e Baltasar recibiron á cativada con agasallos e unha tarde de xogos.
En Laza, os Reis Magos visitaron o Belén vivente antes de escoitar a cada un dos nenos e nenas que os agardaban con ilusión para contarlles todo o que lles pedían na noite máis máxica do ano.
Melchor, Gaspar e Baltasar, repartiron agasallos na Casa da Cultura de Vilardevós. | FOTOS: Cedidas.
Os Reis Magos tiveron unha paxe real moi especial en Vilardevós: a súa alcaldesa, Eva Pérez.
En Oímbra, Melchor, Gaspar e Baltasar visitaron á veciñanza de todas as aldeas acompañados pola súa alcaldesa, ana Villarino.
As caras de alegría, ilusión e felicidade non só eran da cativada de Oímbra.
Tamén estiveron no Riós, agardando a chegada da cativada para regalarlles un libro e algunha que outra lambiscada.
O día anterior, en Florderrei fixeron a tradicional homenaxe á tía Pilar cos cantares de Reis.
Foron moitas persoas as que desfrutaron das melodías recollidas no "Cancioneiro das Terras de Riós" de Xosé Lois Foxo.
E, como non, os cantares remataron cunha cea en comunidade.
A Casa da Viúva da Gudiña foi o lugar onde Melchor, Gaspar e Baltasar recibiron á cativada con agasallos e xogos.
En Laza, os Reis Magos visitaron o Belén vivinte antes de recibir aos máis pequenos do municipio.
