A comarca desfrutou dun fin de semana, repleto de propostas culturais e de lecer que encheron de vida diversos puntos do territorio. Dende concursos musicais ata festas gastronómicas, a variedade foi a nota predominante, demostrando a riqueza da nosa axenda de verán.
A Banda de Gaitas do Concello do Riós viaxou ata Manzaneda para participar no XVI Certame Celtibérico de Bandas de Gaitas durante o sábado e o domingo. A gran final, que tivo lugar o domingo, coroouna como primeira clasificada na súa categoría (4º grao), pechando unha tempada espectacular na que gañaron os tres certames nos que participaron.
Vilardevós ofreceu unha xornada multicultural coa Festa de gastronomía e ritmos africanos na súa piscina municipal o domingo. O evento, organizado pola Asociación Asanta Teranga en colaboración co Concello, foi un auténtico éxito de participación, converténdose nunha fiestra á cultura africana. Dende as 16:00 horas, a música e os ritmos envolveron o ambiente, mentres os asistentes puideron degustar sabores exóticos nun menú degustación, xunto con obradoiros para a cativada.
Pola súa banda, en Oímbra, a diversión para a cativada comezou coa Ludoteca móbil "Movéndonos polos pobos para a rapazada". O domingo á tarde, a carballeira de Oímbra encheuse de colchonetas e xogos nos que a cativada desfrutou ao máximo. Este programa itinerante continuará percorrendo as aldeas do municipio ao longo de todo o mes de agosto e ata o 14 de setembro, levando o lecer a cada recuncho. Foi tamén un fin de semana de celebración relixiosa en Oímbra, onde honraron a Santa Ana na súa capela.
A tradición tamén tivo o seu espazo na III Foliada Torgueira na Gudiña, que se celebrou o pasado xoves 24 de xullo, dando o pistoletazo de saída a este intenso fin de semana. A festa foi unha fermosa homenaxe ás pandeireteiras e cantareiras galegas, contando cun vibrante mercado artesán e reunindo a cantareiras da nosa comarca. Ademén, os asistentes puideron participar nun obradoiro de baile tradicional da man de Mark do Pereiro e desfrutar dunha foliada aberta na que se bailou e danzou ata ben entrada a noite.
A Banda de Gaitas do Concello do Riós quedou no primeiro posto no XVI Certame Celtibérico de Bandas de Gaitas celebrado en Manzaneda. | FOTOS: Eva Barrio.
Eva Barrio, alcaldesa do Riós, non quixo perderse un certame no que a banda de gaitas do seu concello brillou.
A carballeira de Oímbra acollía o domingo á tarde xogos e colchonetas para a cativada nunha iniciativa que levará a ludoteca municipal por todas as aldeas do municipio. | FOTOS: Cedidas.
A piscina de Vilardevós acolleu o domingo unha xornada de gastronomía e ritmos africanos organizada pola asociación Asanta Teranga. | FOTOS: Cedidas.
O venres, numerosas persoas achegáronse ata a capela de Santa Ana para celebrar a súa festividade.
A III Foliada Torgueira na Gudiña fixo mover os corpos ao son da muiñeira ata ben entrada a noite. | FOTOS: Os Torgueiros.
