Rueda augura en Ladairo sete millóns de kilos de uva certificada nesta vendima da D.O.

O presidente da Xunta, Alfonso Rueda, destacou este sábado, nunha visita ás viñas e instalacións de Bodegas Ladairo, as boas previsións de recollida da uva deste ano, o que fai prever unha vendima de récord en Denominacións de Orixe (D.O.) como a de Monterrei, onde se estima recoller máis de 7 millóns de kilos de uva, o que suporía acadar esta cifra por primeira vez na historia.

Así o salientou nunha visita ás Bodegas Ladairo, en Oímbra, na que estivo acompañado pola conselleira do Medio Rural, María José Gómez. Tras realizar un percorrido polos viñedos, puxo en valor os máis de 500.000 quilos de uvas recollidos ata o de agora na D.O. á que pertence esta adega e destacou o bo estado no que se atopan as vides.

Rueda recordou a alta calidade do viño que se produce en Galicia e sinalou que o sector do enoturismo "ten que medrar máis". Así mesmo, salientou a importancia das empresas familiares no sector vitivinícola galego, como é o caso das Bodegas Ladairo, que exemplifican "todo o bo que está sendo o sector vitivinícola en Galicia".

O presidente da Xunta de Galicia estivo acompañado da titular da Consellería de Medio Rural, María José Gómez; do delegado do Goberno autonómico en Ourense, Manuel Pardo; do presidente da Deputación de Ourense, Luis Menor, así como das alcaldesas de Oímbra e Riós, Ana María Villarino Pardo e Eva Barrio, respectivamente; e os deputados autonómicos Miguel Ángel Viso, Juan Manuel Casares e o verinense Víctor Baladrón.