NOTICIAS VERÍN | A Garda Civil retira un posible artefacto incendiario no lume das Chas

Axentes da Garda Civil de Verín retiraron da estrada de Oímbra ás Chas o que podería tratarse dun artefacto incendiario que se atopaba na calzada, a carón da cuneta e a uns catrocentros metros de onde se orixinou o lume que vén de calcinar xa unhas 20 hectáreas, segundo o último parte da Consellería de Medio Rural. 

O lume de Oímbra comezou pasadas as catro e media da tarde e as lapas acabaron rodeando á capela de Santa Ana. A Garda Civil de Tráfico tivo que desaloxar o entorno da pequena igrexa, ateigada de curiosos que presenciaban, dende un lugar privilexiado, o avance do lume, sen valorar a perigosidade que supuña permanecer no lugar. 

Na extinción das lapas participaron un axente, cinco brigadas, tres autobombas, catro avións e cinco helicópteros.