A terceira edición da festa da malla da Mezquita volveu a ser todo un éxito de convocatoria. Máis dun cento de persoas se concentraron na aira da Esculqueira para presenciar cómo se mallaba en tempos, e tamén agora. Porque os tres remolques de mollos pasaron pola vella Campeva (acrónimo de Campolongo Pérez Varela, a empresa de maquinaria agrícola que comercializou, con rotundo éxito, estas malladoras), para separar o gran da palla que se amoreaba na eira á espera de enviala para colmar pallozas no Salcedo, en Pontevedra, como así explicaba o seu rexedor Rafael Pérez Vázquez.
A desta xornada foi tamén especial pola visita do televisivo xuíz José Antonio Vázquez Taín, que traballa no seu segundo documental audiovisual, desta vez enfocada no camiño mozárabe que pasa, entre outros, polo municipio de Mezquita.
Tanto a aventadora como os mollos ou os posteriores feixes foron o escenario escollido polos emigrantes, aínda de descanso no lugar, e mesmo turistas, que quixeron inmortalizar o momento. Cara a unha da tarde, dous horas despois de que comezase a Campeva a engulir, remataba a malla, con música tradicional e un xantar popular no que a empanada quedou algo escasa pero non así o porco ao espeto que chegou xa cociñado.
FOTOS: Iván Iglesias.
O Xuíz José Antonio Vázquez Taín, dando instrucións á súa produtora de contidos audiovisuais.
O rexedor da Mezquita, Rafael Pérez Vázquez, pendente de todos os detalles da festa.
