A ilusión máis pura, esa que só entende de ollos abertos coma pratos e sorrisos imposibles de conter, tomou este ano os concellos da Mezquita e A Gudiña coa chegada dos Reis Magos de Oriente. Unha visita agardada durante meses e vivida con intensidade por nenos e maiores, que converteron cada recuncho nun espazo para soñar.
En A Gudiña, a maxia fixo parada na Casa da Viúva, onde Melchor, Gaspar e Baltasar foron recibidos con agarimo e expectación. Alí, ademais de palabras cheas de tenrura e bos desexos, repartiuse un delicioso chocolate quente, perfecto para combater o frío e compartir momentos que quedan gravados na memoria colectiva do pobo.
Xa en A Mezquita, os Reis levaron a súa alegría ao centro multiusos da localidade, onde os máis pequenos recibiron os seus agasallos entre aplausos, risas e miradas cheas de ilusión. Cada paquete aberto era unha pequena explosión de felicidade, unha confirmación de que, polo menos por un día, a maxia existe.
Foron xornadas para lembrar, nas que os concellos volveron demostrar que as tradicións seguen vivas grazas á complicidade dos veciños e á capacidade da infancia para transformar o cotián en extraordinario. Porque mentres haxa nenos esperando polos Reis, haberá futuro, ilusión e esperanza.
Na Gudiña, as SS.MM. fixeron escala na Casa da Viúva. | FOTOS: Cedidas.
Os Reis déronlle unhas horas de descanso aos seus paxes, e contaron con colaboración local para o reparto de presentes.
Na cociña da Casa da Viúva preparouse un exquisito chocolate para repor forzas e poder seguir a viaxe.
E pasando un frío real, as Súas Maxestades de Oriente chegaron á Mezquita.
No centro multiusos da localidade agardaron a que se enchera de cativos, ansiosos por saudar a Baltasar, Melchor e Gaspar.
O Apalpador e o Pai Noel traballaron máis cos Reis Magos no Nadal mezquitense.
O pasado 23 de decembro percorreron todas as aldeas do concello repartindo caramelos e moitísima ilusión e bos desexos.
Tamén se achegaron ata a residencia de anciáns da localidade.
