As rúas da Gudiña enchéronse de devoción onte coa procesión na honra ao beato Sebastián de Aparicio, patrón da localidade. A celebración iniciábase co tradicional canto do Ramo na igrexa de San Martiño, que quedou pequena para acoller a todas as persoas que querían asistir. Dende alí, a procesión percorreu o camiño ata a igrexa de San Pedro portando o ramo e co carro que leva a figura do patrón, onde tivo lugar a misa.
Este ano celebrábase o 425 aniversario do pasamento de Sebastián Aparicio en Puebla de los Ángeles (México), lugar ao que emigrou e onde se consagrou coma frade franciscano. Nado na Gudiña no 1502, antes de ter que emigrar traballou na seitura en Castela, e foi xornaleiro en Estremadura e Andalucía.
Sebastián de Aparicio é considerado o primeiro "charro" en América, home de campo e rancheiro que traballou capturando e domando o gando para converterse no primeiro home que construiu carretas e novos modos de transporte de mercadorías na Nueva España. Beatificado en 1789, considérase patrón dos automóbiles e dos transportes terrestres; por iso na Gudiña as celebracións na súa honra rematan coa bendición dos coches á saída da misa.
O tradicional Ramo acompaña á figura de Sebastián de Aparicio na procesión na súa honra. | FOTOS: Noelia Caseiro.
