O grupo de goberno de Laza vén de anunciar que nos vindeiros días porá en marcha unha serie de medidas de prevención de riscos no perímetro e no interior do coñecido como Parque Feiticeiro ou Bosque Máxico. Así o anunciaron esta mesma mañá os integrantes do bipartito, Jesús Blanco -o rexedor- e Jorge Lorenzo, logo de constataren, esta mesma fin de semana, como era moitos os curiosos que se achegaban ata as instalacións para coñecelas.
Segundo explicou o tenente de alcalde, Jorge Lorenzo, de Xuntos por Laza, "é evidente que nese parque, que está a medio rematar, hai elementos que poñen en risco a integridade das persoas que o visitan, fundamentalmente porque tampouco hai ninguén que supervise que a esas instalacións se lles de un uso adecuado", apuntou.
O bipartito lazano insta tamén á prudencia a todos aqueles que ata alí se acheguen. "Non quixeramos ter que lamentar algún incidente nese recinto por un uso indebido das mesmas", sinalou Lorenzo.
ESTADO DE SEMIABANDONO
O Bosque Máxico, que así se coñecía inicialmente ao Parque Feiticeiro -e que máis tarde se deu en chamar Santiago Park-, presenta un estado de semiabandono das instalacións, tanto no que ao edificio central se refire -unha sorte de espazo multiusos cunha cúpula semicircular que non figuraba no proxecto inicial e para o que se obtiveron subvencións- como na parte instalada entre os piñeiros, na que figuran cestas, pontes colgantes e mesmo lianas para se desprazaren entre eles.