luns 10/08/20
O BNG colócase como segunda forza, sube 1.098 votos, fronte ós 72 que só logra incrementar o PSdeG

Verín esqueceu pronto e só lle fixo perder un de cada tres votos ó PP, que segue sendo o máis votado

O ascenso meteórico do BNG de Diego Lourenzo nestas autonómicas na vila, propulsado polo efecto do Verín Non Se Pecha, non foi suficiente para evitar que o PP mantivese o primeiro posto das forzas máis votadas. Con todo, os populares de Jiménez perderon 1.013 votos, un de cada tres dos que tiñan no 2016.

Diego Lourenzo, tenente de alcalde verinense, no centro; acompañado por Eugenio Quintas, concelleiro en Verín, e a coordinadora comarcal do BNG, Samanta Barreira. | FOTO: Noelia Caseiro.
Diego Lourenzo, tenente de alcalde verinense, no centro; acompañado por Eugenio Quintas, concelleiro en Verín, e a coordinadora comarcal do BNG, Samanta Barreira. | FOTO: Noelia Caseiro.

O efecto do Verín Non Se Pecha non foi suficiente para colocar ao Partido Popular no lugar que lle correspondería polo agravio que o seu presidente rexional quixo inflixir á cidadanía da vila e da comarca. Aínda así, os populares de Jiménez Morán perden un de cada tres dos votos obtidos no 2016, pasando dos 3.576 da anterior consulta aos 2.563 desta xornada. A caída, que supón un 28,33%, contrasta coa espectacular subida do BNG que lidera Diego Lourenzo Moura, o tenente de alcalde do Concello de Verín. Así, xa cos datos ao 100% do escrutinio, a formación da voceira nacional Ana Pontón colócase como a segunda forza na vila nunhas autonómicas, pasando dos 828 sufraxios no 2016 aos 1.926 desta noite electoral, o que supón un aumento de 1.098 votos, ou o que é o mesmo, un incremento porcentual do 132,61 por cento con respecto a catro anos atrás. 

Quen non experimentou case variación foi o PSdeG. Aínda que contaba cun verinense nos postos de saída das listas pola provincia de Ourense, Juan Carlos Francisco, a formación da rosa só subiu 72 sufraxios, colocándose como terceira forza nas autonómicas con 1.401 papeletas, fronte ás 1.329 que obtivo na anterior convocatoria de 2016.

E na comarca?

As variacións que se experimentaron na vila son parellas ás computadas na comarca de Verín. O Partido Popular mantense como a primeira forza, con 6.330 votos, 2.311 menos que no 2016 (cae un 26,74 por cento). Pola contra, o BNG case triplica os seus resultados, pasando de 1.350 a 3.260 sufraxios, cunha subida do 142,07%. O PSdeG só suma 75 novos votos na comarca, baixando á terceira posición na de Verín. 

Verín esqueceu pronto e só lle fixo perder un de cada tres votos ó PP, que segue sendo...
comentarios