Os rexistros do SERGAS contradín a Feijóo: foron admitidos 121 aspirantes para as 9 prazas de pediatría convocadas na Oferta Pública de Emprego 2016

Ante o clamor popular esixindo a reapertura das urxencias pediátricas e o paridoiro do Hospital de Verín que promoveu unha mobilización social na bisbarra sen precedentes ata o de agora, dende a Xunta de Galicia publicáronse moitas explicacións supostamente baseadas en datos.

A última das desculpas esgrimidas polo Presidente da Xunta de Galicia, Alberto Núñez Feijóo, para reafirmar o peche dos servicios no Hospital de Verín era a dificultade de encontrar pediatras. Un discurso xa modelado e que contradecía as propias declaracións da Consellería de Sanidade, a través de Félix Rubial -xerente da área sanitaria de Ourense, Verín e o Barco-, nas que se afirmaba que a sala de partos se pechaba polo descenso da natalidade e pola suposta falta de pericia dos xinecólogos do Hospital de Verín.

Nembargantes, logo do acontecido no centro sanitario da vila co nacemento do último neno nun parto de urxencia, o propio Núñez Feijóo abría a posibilidade de reactivar o paridoiro e as urxencias pediátricas no hospital sempre que se cubriran as dúas prazas de pediatría convocadas o xoves, 12 de decembro, con carácter temporal e pola vía do concurso de méritos. Deixaba entrever Feijóo que a causa do peche do paridoiro era que non había aspirantes para cubrir prazas de pediatría.

Os datos públicos do SERGAS contradín a Feijóo. Na última Oferta Pública de Emprego do SERGAS realmente levada a cabo, a do 2016, existían 9 prazas de pediatría ás que se presentaron máis dun cento de aspirantes. Deles, según os datos do SERGAS, finalmente foron admitidos 121 que puideron optar ás fases de oposición e concurso para acadar unha das 9 prazas definitivas.

A OPE 2016 do SERGAS publicouse no Diario Oficial de Galicia o 7 de marzo do 2016, pero foi o 2 de xaneiro do 2019 cando se publicou a resolución definitiva da adxudicación de destino e do nomeamento. É dicir, o proceso para a cobertura das 9 prazas de Pediatría tivo unha duración de 34 meses. Logo do nomeamento definitivo, foron tres os facultativos destinados na Área Sanitaria de Ourense, Verín e O Barco de Valdeorras; iso si, con centro de destino no CHUO.

Ofertas Públicas de Emprego no SERGAS

As 9 prazas de Pediatría das que estamos a falar correspóndense á OPE do 2016. O SERGAS anuncia, dende entón, convocatorias de distintas prazas de facultativos sanitarios cada ano. No 2017 non se contemplou ningunha para a Área de Pediatría. No 2018 a OPE do SERGAS anunciaba 27 prazas para a Área de Pediatría. Neste 2019, o SERGAS inclúe na súa OPE un total de 6 prazas para pediatras.

WEB do Servicio Galego de Saúde onde se informa do proceso selectivo das prazas de Pediatría da OPE 2018.

Á longa duración dos procesos selectivos do SERGAS, 34 meses no correspondente ó 2016, únese o feito de que aínda non deu comezo nin o do 2018 nin o do 2019. Somentes está publicado o decreto da oferta, máis non se iniciou ningún trámite posterior, nin sequera a publicación do temario ou da resolución da convocatoria do proceso selectivo.

Os procedementos utilizados nas oposicións resultan complicados tal e como se veñen realizando ata o de agora. Non semella moi eficiente que un proceso de cobertura de prazas teña unha duración de 34 meses, case tres anos para facer efectiva a cobertura de persoal sanitario que, a priori, é necesario para o bo funcionamento da Sanidade Pública Galega.

Tamén é de subliñar o feito de non pór en marcha os procesos selectivos correspondentes ás OPE 2018 e 2019, que suporía a creación de prazas fixas de pediatras; é dicir, de postos de traballo estables e con condicións dignas. Pero si se sacan a concurso de méritos dúas prazas temporais para pediatras da Área Sanitaria de Ourense, Verín e O Barco de Valdeorras o pasado xoves, día 12, no medio das protestas da veciñanza e da mobilización social que causou o peche do pariodoiro e das urxencias pediátricas do Hospital de Verín.