Paco Sarria acada o Premio Carracedo á traxectoria xornalística | NOTICIAS OURENSE
O xornalista ourensán Francisco González Sarria, coñecido profesionalmente como Paco Sarria, foi proclamado gañador da distinción honorífica á traxectoria profesional na 35 edición do Premio de Xornalismo Xosé Aurelio Carracedo, prestixioso certame que anualmente concede a Deputación de Ourense. Cun percorrido de máis de corenta anos no eido da información, o xurado valorou de maneira específica o seu estilo de comunicación comprometido coa realidade ourensá e o uso constante da lingua galega como ferramenta de difusión e nexo cultural. Así mesmo, destacouse a súa traxectoria na defensa activa da profesión, na que exerceu durante oito anos como decano do Colexio Profesional de Xornalistas de Galicia.
No apartado de traballos xornalísticos, o premio principal, dotado con 4.000 euros, recaeu en Diego Freire Fernández polo documental de investigación titulado “Quen contamina a Limia”, publicado no medio dixital Noticias Dispersas. O xurado sinalou que a produción ofrece unha perspectiva estruturada e de fácil comprensión con datos accesibles sobre un tema de gran relevancia social para a comarca de A Limia. Tamén se subliñou o mérito de facer o contido ameno mediante un ton rigoroso pero entretido, valorando o crecemento do propio medio nos seus cinco anos de vida.
Pola súa banda, o accésit ao segundo mellor traballo, dotado con 1.000 euros, foille concedido ao xornalista Xosé Lois Colmenero, redactor xefe do xornal dixital Diario do Támega pola cobertura especial titulada "Ourense baixo o lume: compromiso, risco e resultado". Segundo recolle a acta do xurado, este traballo de seguimento en diversos formatos exemplifica un modelo de xornalismo de proximidade, pegado de forma directa á veciñanza, mantendo unha visión crítica e rigorosa ante a problemática dos lumes forestais que afectan a todo o territorio de Monterrei e de toda a provincia.
O órgano avaliador desta trixésimo quinta edición estivo presidido polo vicepresidente segundo da corporación provincial e deputado de Cultura, César Fernández, actuando como vogais Alba Silva, Paulino Pérez, Javier Fraiz e Xulia Campos, coa asistencia de Alberto Carnero na secretaría técnica. A entrega formal dos galardóns terá lugar no transcurso dun acto público que a Deputación de Ourense organizará nas vindeiras datas.