O Concello de Verín vén de anunciar, a través da concelleira de RR. HH. e Réxime Interior, Rosario Rodríguez, a data de apertura das piscinas municipais para este verán. Será o vindeiro xoves, 1 de xullo e, ao igual que o ano pasado, realizarase coas pertinentes modificacións no seu uso, destinadas a garantir a seguridade dos seus usuarios e atendendo ás actuais indicacións sanitarias.
O aforo total das instalacións será dun máximo de 400 persoas que abrirán de luns a domingo, en horario ininterrompido de 12:00 a 20:00h. Estarán debidamente diferenciados o acceso e a saída, sendo obrigatorio o uso da máscara en recepción e vestiarios, nos cales non estarán dispoñibles as duchas. Tamén o será no exterior sempre que non se poida manter a distancia mínima establecida. Todo o recinto será limpado e desinfectado de maneira reforzada para cumprir co esixido pola lexislación en materia de Covid-19.
Tamén se dispoñerá de dispensadores de xel desinfectante e o uso de calzado de piscina será obrigatorio. Será tamén de carácter obrigatorio cumprir coa sinalización establecida en todo o recinto e obedecer ás indicacións dos empregados.
Na zona de baño tamén estará disposta unha entrada e unha saída diferenciadas e estará prohibido o uso de xoguetes ou outros obxectos de entretemento. Dende o Concello chaman á precaución, recordando que a reapertura das piscinas non implica baixar a garda con respecto ao virus. A concelleira, Rosario Rodríguez, tamén anunciou a reapertura do servizo de bar.
As tarifas de acceso
- Se dispón da tarxeta da Eurocidade:
- 0,75 € para menores de 14 anos
- 1,40 € para maiores de 14 anos
- Se non dispón da tarxeta da Eurocidade:
- 0,90 € para os menores de 14 anos
- 1,75 € para os maiores de 14 anos
- Os menores de 2 anos poderán acceder de balde
