Femuro venderá libros usados para financiar programas sociais de emerxencia na comarca
Todos os martes e xoves, a asociación sube a Facebook libros de segunda man e artigos de artesanía realizados por mulleres.
A compra realizarase online para manter as máximas medidas de seguridade de cara á pandemia Covid: os artigos poderán atoparse na conta da Federación en Facebook, Femuro Ourense Verín.
Os libros son doados por editoriais e empresas que queren colaborar coa causa e os artigos artesáns elabóranos mulleres voluntarias. Neste mercadillo solidario, a asociación tamén vende obxectos de decoración e as novidades que poidan ir cedendo empresas ou particulares.
Femuro é unha organización que se adica a promover a igualdade de oportunidades e o desenvolvemento das mulleres rurais en todos os ámbitos, conseguindo que dispoñan da información suficiente para axudalas a desenvolver as súas capacidades sociais e económicas.
A loita pola erradicación da violencia sufrida pola muller e a súa inserción laboral son eixos do seu traballo, pero non son obxectivos exclusivos. Entre outras, achegan medidas gubernamentais ao rural ourensán para promocionar o seu coñecemento nas aldeas da comarca; outras veces, realizan iniciativas propias, como é o caso deste Mercadillo Solidario de Verán.