domingo 20.10.2019

Aberta a inscrición para os cursos de instrumentos musicais tradicionais galegos

Cada un dos cursos terá unha duración mínima de 35 horas formativas, en sesións semanais que comezarán na segunda quincena diste mes de outubro. A inscrición pódese facer na Casa Consistorial de Verín.

Os cursos comezarán na segunda quincena de outubro.
Os cursos comezarán na segunda quincena de outubro.

O Concello de Verín vén de abrir o prazo para a inscrición nos cursos de instrumentos tradicionais galegos que se desenvolverán ó longo do ano escolar na vila. As actividades formativas céntranse no ensino dos tres instrumentos fundamentais da música galega: gaita, pandeireta e tambor. Comezarán na segunda quincena deste mes de outubro e rematarán en xuño do vindeiro ano, en sesións semanais dunha hora ata completar un mínimo de 35 horas de formación.

A matrícula dos cursos pódese realizar na Casa do Concello, cun custo que oscila entre os 47,5 € e os 90 € para as persoas empadroadas en Verín e entre os 60 e 120 euros para as non empadroadas. O pagamento poderase liquidar nunha soa vez ou fraccionarse a través de domiciliación bancaria, con mensualidades sen recargo sobre o prezo total.

Bonificacións aplicables

O Concello de Verín aplicará tarifas reducidas atendendo á situación de cada familia. Diste xeito, teñen dereito a bonificacións do 20% sobre as cantidades máximas as familias numerosas, ó 35% o segundo membro da familia matriculado e a descontos entre o 25% e o 50% sobre o custo máximo as familias con circunstancias socioeconómicas adversas e familias monoparentais.

Para acceder á bonificación por circunstancias socioeconómicas adversas a renda per cápita familiar non poderá ser superior aos 9.000 € brutos anuais. Como renda per cápita familiar enténdese a renda da unidade familiar de convivencia dividida entre o número de membros da unidade familiar computábeis. Así, se a renda per cápita familiar é inferior ou igual a 5.400 euros brutos anuais, a bonificación será do 50%; se é superior a isa cantidade pero non chega ós 9.000€ brutos anuais, será do 25%.

Aberta a inscrición para os cursos de instrumentos musicais tradicionais galegos
comentarios