domingo 17/01/21
Feijóo porfía en dicir que foi a pediatra quen denunciou por "iniciativa propia" a Castrillo, cando ela declarou o contrario

Caballero a Feijóo: "A quen había que expedientar era a vostede por tentar pechar o paridorio de Verín"

O presidente da Xunta, Alberto Núñez Feijóo, segue enrocado en afirmar que non se trata dun expediente disciplinario aberto contra Castrillo e que foi a pediatra quen denunciou. As evidencias do procedemento e a propia facultativa contradín ó xefe do Executivo. Caballero vén de pedirlle que "lle faga un monumento ao xinecólogo" e retire ese expediente. 

O presidente da Xunta, Alberto Núñez Feijóo, responde as preguntas dos grupos no Pleno da Cámara.
O presidente da Xunta, Alberto Núñez Feijóo, responde as preguntas dos grupos no Pleno da Cámara.

O presidente da Xunta, Alberto Núñez Feijóo, e o líder do PSdeG, Gonzalo Caballero, volveron a protagonizar un enfrontamento na Cámara a raíz do expediente aberto contra o xefe de Xinecología do Hospital de Verín, Javier Castrillo.

Así, Feijóo volveu a negar que o proceso administrativo aberto no Sergas contra Castrillo sexa "unha vinganza política" ou "unha purga" contra un dos profesionais que encabezou un ano atrás a loita contra o peche do paridoiro comarcal -posteriormente reaberto-.

Fronte ás duras críticas do líder do PSdeG, Gonzalo Caballero, quen levou este asunto á sesión de control e instoulle a retirar o expediente contra Castrillo, Feijóo insistiu en que a "información previa" contra o xinecólogo abriuse porque o instou a pediatra coa que tivo o conflito polo traslado a Ourense dun recentemente nado e defendeu a "independencia" da Inspección Médica.

De feito, Feijóo esgrimiu que será a Inspección Médica a que decidirá se se "activa un expediente" contra o xinecólogo ou se arquiva a denuncia -a documentación remitida ao médico fai constar que se trata xa dun expediente disciplinario e non como asegura o titular do Executivo autonómico-.

E após incidir en que Caballero xa expuxo este asunto na Cámara "no día da igualdade", Feijóo asegurou que lle parece "lamentable" que volva insistir en "cuestionar" a unha pediatra que trasladou aos seus superiores que Castrillo tivera con ela "un trato desconsiderado" ante a familia dun bebé.

"Está a dicir que lle mandan a unha pediatra que denuncie? Habería que dicir á pediatra que cale?", preguntou Feijóo, quen cargou contra Caballero por "retorcer a realidade" e pediulle "deixar en paz" aos profesionais. "Podería non contestarlle, pero son demócrata", aseverou, para engadir que no pasado ano iniciáronse máis de 20 expedientes.

"Suxire que foron todos instados por unha autoridade maléfica que quere deturpar o sistema sanitario?", preguntou Feijóo a Caballero, quen alertou das "represalias" que evidencia a "peor cara do PPdeG" un ano despois do conflito do paridoiro.

"Non o fixo por iniciativa propia"

Ademais, o socialista lembrou que, na súa propia declaración, a pediatra asegura que inicialmente non deu o paso de denunciar "por iniciativa propia", senón que llo "pediron" despois de comentar o sucedido co seu xefe de servizo e este coa Xerencia.

"Cargos nomeados por vostede", remarcou o dirixente socialista, quen arrincou a súa intervención cunha referencia ao Pazo de Meirás e subliñando que esta é "unha xornada histórica" para recuperar a memoria do país e lembrar o que fixo o franquismo.

Caballero, que desde o primeiro momento apoiou ao xinecólogo Castrillo, insistiu en que Feijóo debería retirarlle o expediente e "facerlle un monumento" pola seu defensa da sanidade pública. "E é vostede o que debe deixar en paz aos profesionais", trasladou ao presidente, antes de abundar en que está "acurralado polas mentiras que pronunciou desde o principio" do conflito do paridoiro. "A quen había que expedientalos era a vostedes por tentar pechar o paridoiro de Verín", lle espetou o líder do PSdeG. 

"Por mentir", o dirixente socialista subliñou que Feijóo "mesmo mentiu" na última sesión plenaria en relación ao resultado electoral en Verín. Feijóo respondeulle posteriormente que o dato que deu referíase ao partido xudicial, non á localidade, e que o do PSdeG, en todo caso, foi peor.

O presidente di que minten

"Asombra o que se pode chegar a dicir e facer por interese partidista. Como se pode retorcer, manipular e mentir nun Parlamento. Os políticos que acoden a este modelo son políticos que fan un pésimo servizo á política", recalcou o presidente galego, quen negou que haxa "represalias" políticas na Comunidade, e acusou ao PSdeG de pór en cuestión a "independencia" dos profesionais.

O mandatario galego engadiu que "isto non é Ferraz nin un problema interno do PSdeG" e as decisións adóptanas "os inspectores" sen interferencias políticas, e devolveu a Caballero as acusacións de "mentiras". Todo iso, antes de proclamar: "O problema dun político non é que minta, é que xa nin saiba cando está a mentir".

Así mesmo, aínda que asegurou que responde a Caballero porque é "demócrata", concluíu que "falar de vinganzas ou purgas" cun Goberno "democrático" ou nun Parlamento "democrático" é "lamentable".

Caballero a Feijóo: "A quen había que expedientar era a vostede por tentar pechar o...
comentarios