martes 24/11/20
O vindeiro venres volverán a reunirse os técnicos para evaluar a situación

O comité clínico da Xunta non levanta o confinamento perimetral de Verín, Vilardevós e Oímbra

Sen cambios. Aínda que comezan a rexistrarse menos casos activos en Verín e na comarca, a Xunta de Galicia, logo da reunión do comité clínico, mantén o confinamento perimetral do municipio verinense e de Vilardevós e Oímbra

Imaxes coma a da instantánea seguiranse vendo nos accesos a Verín, Vilardevós e Oímbra. | FOTO: Noelia Caseiro.
Imaxes coma a da instantánea seguiranse vendo nos accesos a Verín, Vilardevós e Oímbra. | FOTO: Noelia Caseiro.

O comité clínico decidiu manter en vigor todas as restricións vixentes en Galicia para conter os contaxios por Covid-19, incluído o confinamento perimetral das grandes cidades.

Segundo informaron fontes da Consellería de Sanidade, tras unha reunión de máis de catro horas de duración, o comité clínico "mantén as restricións e seguirá tomando decisións nos próximos días". A próxima reunión dos asesores en materia sanitaria está prevista para o vindeiro venres.

A Xunta decidiu o pasado venres impor un confinamento perimetral das sete grandes cidades galegas e algúns municipios limítrofes, así como do concello coruñés de Vimianzo, que se engadiu ao das comarcas ourensás de Verín e O Carballiño, co obxectivo de conter a expansión do virus.

Así, desde as 15:00 horas do pasado venres, en torno ao 45% da poboación galega non pode saír do seu concello e en varios municipios as reunións están limitadas a só persoas que viven baixo o mesmo teito.

Ademais, continúa a prohibición de mobilidade en toda a comunidade se non é por causa xustificada entre as 23,00 e as 6,00 horas e o nivel dous impide as reunións sociais de máis de cinco persoas en toda Galicia.

Evolución dos casos

Esta decisión do comité clínico prodúcese despois de que os positivos por Covid-19 confirmados por PCR nas últimas 24 horas se apuntasen un novo descenso en Galicia, ao detectarse outros 425 por PCR, fronte aos 597 do luns e tras superar os 700 nas xornadas da fin de semana. No caso da comarca de Monterrei, só se rexistraron nas últimas 24 horas tres novos positivos: dous en Verín e un en Oímbra. 

No entanto, os últimos datos dispoñibles en Galicia apuntan a que os casos activos de coronavirus subiron lixeiramente, até os 9.376. Ademais, os pacientes con Covid-19 ingresados en hospitais galegos volveron aumentar até os 545, o que supón 22 máis que os rexistrados o luns, deles 79 en unidade de críticos -dous máis- e 466 noutras unidades -20 máis-.

Respecto das vítimas mortais, en Galicia xa alcanzan as 951 desde o inicio da pandemia, despois de que nas últimas horas se rexistrasen sete falecementos. A xornada do luns marcara un pico, con 21 mortes de pacientes diagnosticados con Covid-19, na que foi a xornada con máis decesos desde que o 11 de abril se chegaron a alcanzar os 23 falecidos.

O comité clínico da Xunta non levanta o confinamento perimetral de Verín, Vilardevós e...
comentarios
Entrando na páxina solicitada Saltar publicidade