A xerencia do Centro de Día para Maiores de Verín organiza para hoxe venres 29 de marzo unhas xornadas de portas abertas ao público da vila e contorna, co gallo de ensinarlle a todos aqueles interesados en obter praza as instalacións do novo servizo municipal do Concello de Verín. Segundo confirmaron dende a xerencia, dende as 10:00 ata as 19:00 horas estará aberto o recinto, de xeito ininterrumpido. Persoal da compañía adxudicataria informará aos que ata alí se acheguen de todos servizos que se prestarán dende o vindeiro mes de abril, no que comezarán a chegar os primeiros usuarios que xa dispoñen de praza asignada.
O pasado venres, o Centro de Día organizou tamén unha xornada de portas abertas para os primeiros vinte inscritos que xa comunicaron a súa reserva de praza. Arredor dun cento de persoas se achegaron ata alí, nunha tarde na que tamén se aproveitou para retratar -da man do fotógrafo Borys Martínez- aos novos usuarios, que terán a súa fotografía enmarcada nas paredes da instalación, por xentileza da nova xerencia.
