O BNG reclama data concreta para abrir o punto de encontro familiar en Verín | NOTICIAS VERÍN
A deputada do BNG no Parlamento galego, Ariadna Fernández, reclamou ao PP que fixe unha data concreta de apertura para o punto de encontro familiar de Verín e que abandone os anuncios que cualificou de “resesos” arredor dun servizo que continúa sen funcionar malia levar anos figurando nas previsións oficiais.
A infraestrutura apareceu recollida nos orzamentos da Xunta cun investimento de 240.000 euros no ano 2023 e, segundo as previsións iniciais, debería estar operativa en 2025, mais a día de hoxe segue sen poñerse en marcha. A parlamentaria nacionalista denunciou a falta de dilixencia do Goberno autonómico e acusouno de empregar estes anuncios para ocultar a súa incapacidade de xestión.
“Queremos denunciar a pouca dilixencia logo de publicar anuncios resesos para tapar a súa incapacidade”, sinalou Fernández, quen apuntou que o caso de Verín non é illado. Segundo explicou, tamén os centros previstos en Lalín e Cervo levan anos sendo anunciados pola Consellería correspondente sen que cheguen a abrir as súas portas nin prestar o servizo necesario ás familias.
No caso de Cervo, a ausencia deste recurso obriga ás familias e ás crianzas a desprazarse ata Ourense, co conseguinte gasto de tempo e combustible, ademais das incomodidades para os propios usuarios e usuarias. Na actualidade, estes puntos de encontro familiar só están dispoñibles nas sete cidades galegas e en Ribeira, o que deixa amplas zonas do territorio sen cobertura próxima.
Ante esta situación, o BNG avanzou que volverá presentar iniciativas no Parlamento galego para pedir explicacións ao PP polos atrasos acumulados e para esixir compromisos claros. “Queremos saber cando se van poñer en funcionamento, que poñan unha data fixa e que deixen de facer anuncios resesos porque o que evidencian é a súa falla de compromiso total”, concluíu a deputada.