Aever pon en marcha hoxe a campaña de Nadal con 6.000 euros en premios por mercar en Verín
Mercar en Verín sempre ten premio, e ata o 26 de decembro e dende hoxe, máis. Os comerciantes da vila repartirán 6.000 euros nos vindeiros dous meses en oito cheques, o maior de 2.000.
Mercar en Verín terá premio, o maior das últimas décadas que organiza a asociación de empresarias e empresarios da vila, Aever. 137 comerciantes participan na campaña "Os 6.000 de Verín", co que premiarán, de xeito colectivo, as compras que ata o vindeiro 26 de decembro deste 2020 se realicen nos establecementos asociados.
Participar será moi sinxelo. Bastará con mercar na vila e solicitar unha ou varias das papeletas que, polo importe da compra e segundo o criterio do titular do establecemento, lle corresponda. Antes de saír da tenda, ou comodamente na casa, deberá cumplimentala de xeito claro e introducila nalgunha das furnas que estarán repartidas por todos os comercios.
Os premios, no seu conxunto, serán os maiores que se teñan entregados na historia recente de Aever. Un cheque de 2.000 euros, outro de 1.000 e seis de 500 sortearanse, ante notario, o día 30 de decembro de 2020 e a condición -como non pode ser doutro xeito- será a xa coñecida: gastar os cartos nos establecementos asociados antes do día de Reis de xaneiro do 2021.
A campaña presentouse esta mesma mañá na sede de Aever, e contou coa presenza da concelleira de Comercio, María Isabel González; o xerente do colectivo empresarial, José Ángel Rodicio, e do seu presidente, Santos Álvarez.
Rodicio destacou o difícil momento que está a vivir o comercio local e a necesidade "de que todos rememos na dirección de mantelo e apostar polas compras na vila, iso si, apelando sempre a manter a responsabilidade para combatir a pandemia que estamos a sufrir", sinalou. Rodicio tivo tamén unha mensaxe de apoio "a todos os que están a padecer a enfermidade e a todas esas familias da vila e da comarca que, por culpa dela, perderon a un ser querido", apuntou.