Iván Olmos Ferreiro, limián de nacemento, graduado en Comunicación Audiovisual pola Universidade de Santiago de Compostela, campión mundial de discursos no recente certame chileno e colaborador deste diario presentou onte no Campus Universitario da capital de As Burgas a súa candidatura "O mar non ten cancelas", coa que aspira a liderar a oferta política da formación En Marea para obter representación nas cámaras do Congreso e Senado nas vindeiras eleccións xerais do mes de abril.
Olmos Ferreiro estivo acompañado da meirande parte dos membros da súa proposta, entre os que estaba o nome escollido para o Senado, o mestre Millán Brea.
O candidato ao Congreso, Iván Olmos, afirmou no acto público de presentación que "xa é tempo de que Ourense teña, por fin, unha representación digna no Congreso dos Deputados que traballe con autonomía e sen tutelas, e que sexa quen de situar os problemas máis importantes da provincia no debate político estatal, problemas dunha importancia capital, como son o reto demográfico, a desprotección dos sectores produtivos ou mesmo a falta de inversión en infraestruturas esenciais para o desenvolvemento desta provincia", sinalou.
"Xa é tempo de que Ourense teña, por fin, unha representación digna no Congreso dos Deputados que traballe con autonomía e sen tutelas, e que sexa quen de situar os problemas máis importantes da provincia no debate político estatal", dixo Iván Olmos na presentación da candidatura que lidera
Pola súa banda, Millán Brea, incidiu na necesidade de traballar para reverter o elevado índice de emigración xuvenil, así como o avellentamento que afecta ao conxunto do país e que ten especial incidencia na nosa provincia. “É momento de recuperar a ilusión. O Senado non pode ser o premio para a xente que leva anos en política, ou que se presta a favores para loitar polas presidencias provinciais de determinadas formacións políticas, senón unha cámara activa ao servizo da cidadanía”, indicou.
En Marea anima a todas as persoas inscritas a pronunicarse e tomar parte activa no proceso de primarias que se desenvolverá a esta fin de semana. Dende hoxe venres 8 ás 9,00 horas e ata o domingo 10 de marzo ás 23,59 estarán abertas as votacións para o deseño das candidaturas coas que a formación concorrerá ás próximas eleccións xerais e europeas, que no caso da provincia ourensán será, previsiblemente por ser a única, a que encabeza Iván Olmos.