Ana María Villarino, a alcaldesa de Oímbra, acudíu este mércores ao despacho da delegada territorial, Marisol Díaz, convidada por esta última, para facer un amplo repaso do que foi a colaboración entre ambas as dúas institucións, Xunta e Concello, e fixar unha folla de ruta de cara aos vindeiros catro anos de novo e refrendado mandato da rexedora popular.
Díaz Mouteira, como está a facer co resto de primeiros edís municipais da provincia, fixo fincapé na importancia de continuar coa colaboración institucional e brindoulle a Villarino Pardo todo o apoio e diálogo da Administración autonómica para poder axilizar e desenvolver con éxito os proxectos do seu concello que garantan o progreso e benestar da veciñanza. A alcaldesa espúxolle á representante autonómica na provincia algunhas das demandas máis destacadas que ao seu entender ve como precisas para Oímbra. Sobre a mesa, ademais dunha serie de melloras en varios núcleos de poboación do Concello, Ana María Villarino solicitou o apoio da delegada territorial para impulsar o proxecto de edificación de vivendas sociais no municipio e reclamou a súa intermediación para que se instale un caixeiro na capitalidade, "un servizo que entendo imprescindible para a veciñanza", apuntou Villarino Pardo.
IMPORTANTE ACHEGA DO ENTE AUTONÓMICO
A representante autonómica lembrou que nos últimos catro anos Oímbra recibiu do Goberno galego achegas por un importe de máis 2,5 millóns de euros. Así, as diferentes consellerías da Xunta concederon a este municipio ourensán 935.000 euros en materia de subvencións; máis dun millón de euros en convenios; e máis de 591.000 euros pertencentes a outras actuacións.
Díaz Mouteira repasou os numerosos proxectos que Administración autonómica puxo en marcha durante o período 2015-2019 en Oímbra como a mellora da estación depuradora de augas residuais e das redes de abastecemento e saneamento, a recuperación dunha adega-lagar con fines turísticos, distintas iniciativas relacionadas coa prevención e defensa contra os incendios forestais, e o acondicionamento e ampliación da Casa do Concello, entre outros.
