Oímbra busca a casa máis fermosa do Nadal: participa e gaña unha espectacular cesta

O Concello de Oímbra vén de lanzar, como cada ano, o seu concurso de decoración do Nadal para dinamizar as festas e poñer en valor o espírito comunitario durante esta época do ano. Trátase dun concurso pensado para animar á veciñanza a decorar as súas vivendas e as aldeas do municipio, dando cor e luz a estes días de inverno.

A proposta convida ás persoas participantes a compartir fotografías das súas decoracións, amosando balcóns, fachadas, casas ou recunchos das aldeas engalanados para estas datas. O obxectivo é facer visible o traballo e a creatividade da veciñanza, ao tempo que se fomentan a ilusión e a convivencia durante estas festas tan especiais.

Poden participar todas as persoas que publiquen unha fotografía da súa decoración de Nadal, xa sexa da casa ou dun recuncho decorado da súa aldea. A fotografía que obteña máis “gústames” nas redes sociais será a gañadora dunha Cesta de Nadal.

Requisitos para participar

Para competir pola cesta de Nadal, é necesario:

• Ser maior de 18 anos.

• Residir ou ter casa no Concello de Oímbra.

• Seguir a conta oficial do Concello nas redes sociais.

• Publicar unha fotografía real e propia, sen manipulación significativa mediante IA.

• Empregar o hashtag #nadalenoimbra2025 e mencionar @concelloedoimbra.

• Ter o perfil público durante todo o concurso.

• Non etiquetar a outras persoas no post, xa que isto invalidará a participación.

Duración

O concurso estará aberto desde o 8 de decembro de 2025 ás 00:00 h ata o 28 de decembro de 2025 ás 23:59 h.
Só se admitirán publicacións dentro deste período.