sábado 24.08.2019
Esta tradición volveuse retomar dende fai 6 anos

Comeza a Semana Santa de Oímbra

Mañá retomarase un ano máis Semana Santa en Oímbra, importante festividade na poboación, que conta con procesións moi ben valoradas polos veciños e os visitantes que se achegan ata o pobo.

Cartel da Semana Santa en Oímbra.
Cartel da Semana Santa en Oímbra.

Este xoves comeza a Semana Santa en Oímbra. Cargada de misas e procesións, volveu adquirir importancia fai seis anos, coa chegada do cura Raúl ao pobo, que axudou aos veciños a volver a implantala coma anos atrás.

De entre todas, a presidenta da Comunidade de Montes, Maribel Pardo, destaca a Procesión dos Penitentes e o Oficio das Tinieblas, que terá lugar mañá ás 21:00 h na igrexa antiga. "Os Penitentes é moi bonito, faise de noite e póñense unhas velas que se van apagando. Cando isto pasa, a igrexa queda ás oscuras. Ao proceso chámaselle as Tinieblas e a posteriori, os xudeus pican na pedra coas lanzas e fan chispas no chan. Unha vez os xudeus fan isto, saen os penitentes, que van a gatas e levan unha coroa de laureiro. Axeonllados durante o todo percorrido, baixan pola calzada da igrexa, percorren unha rúa do pobo e volven subir. Cada un vai iluminado por unha vela".

Celso Alonso, veciño de Oímbra, destaca a orixinalidade desta procesión, afirmando que "non existe noutro sitio". Tamén dá importancia ao venres, coa Procesión do Encontro ás 12:00 h na praza do pobo, e o Desencravo e Procesión do Santo Enterro ás 20:00 h, na que, segundo asegura, "Xesús está cravado na cruz, desencrávano e méteno nunha urna, procedendo á Procesión do Enterro, que vai dende a igrexa vella ata a nova".

Tanto Maribel coma Celso coinciden na importancia do cura Raúl para a volta da Semana Santa e na afluencia de xente que vai ver os Penitentes, afirmando ambos que é "algo que hai que ver para entendelo".

Comeza a Semana Santa de Oímbra
comentarios