Na mañá deste xoves, 27 de agosto, comezou a vendima na Denominación de Orixe Monterrei; a adega encargada de inaugurar a campaña deste 2020 foi Pazo das Tapias, onde os profesionais do sector traballaron na recolección de godello.
Á xornada inaugural acudiron o xerente da adega Pazo das Tapias -tamén xerente da empresa matriz do grupo, Pazo do Mar-, Manuel Méndez, e a presidenta do Consello Regulador da D.O., Lara Da Silva.
Segundo informa Da Silva, a presente campaña augura bos resultados en Monterrei, segundo os datos aportados polos técnicos do Consello Regulador, que estiveron visitando durante a pasada semana todo o territorio da D.O.
Constataron que a uva se atopa "nun estado fitosanitario excelente" e pronostica unhas previsións de recollida que "rondan as cifras do ano pasado, é dicir, uns 5.600.000 kg".
A presidenta do órgano rector explica que as boas previsións se deben ó aumento de precipitacións das últimas semanas: "a pesar da falta de choiva que as colleitas teñen experimentando este verán, as últimas precipitacións axudaron moito a paliar ese estrés hídrico que viña sufrindo a uva".
"O forte da vendima vai vir a partir do día 10 de setembro e o 15 do mesmo mes pretendemos ter a todas as adegas en activo", comenta a directora do organismo normalizador.
O día 31 de agosto comezarán a vendimar as Adegas Terrae situadas no Rosal, pertencentes á mesma Denominación de Orixe Monterrei.
Imprescindible a comunicación ao Sergas
O número de persoas que traballan nas campañas de vendima dependen das características das adegas: as que son máis familiares probablemente non fagan contratacións externas e sexan capaces de realizar as tarefas de recolecta entre amigos e familiares.
En cambio, nas adegas máis grandes, a mobilización poderá tocar a unha estimación de entre 30 e 50 persoas traballando en campaña.
Lara Da Silva insiste: "Para poder ter a materia prima recollida sin ningún sobresalto inesperado, é importante que as adegas envíen os correspondentes informes para comunicarlle ó Sergas a cifra de persoas que se van a contratar".