venres 30/10/20
Os usuarios do consultorio reclaman unha reforma do espazo adaptada ás necesidades e esixencias sanitarias

Mantéñense as protestas a carón do contedor de obra que será a sala COVID do centro de saúde de Albarellos

A solución provisional ideada polo Concello de Monterrei para recuperar a actividade no consultorio de Albarellos non convence aos usuarios do centro de saúde da localidade, que seguen a manifestarse. Reclaman unha solución definitiva que lle devolva ás instalacións a capacidade de prestar uns servizos "sanitarios de calidade". 

 

Os veciños de Albarellos incorporaron a súa particular orquestra bidóns metálicos. | FOTO: Noelia Caseiro.
Os veciños de Albarellos incorporaron a súa particular orquestra bidóns metálicos. | FOTO: Noelia Caseiro.

Segundo día de protestas diante da Casa do Concello de Monterrei, que tamén acolle ó minguado consultorio médico. Este mércores, cun convidado máis, o contedor metálico instalado á dereita da entrada do centro de saúde que fará as veces de sala COVID, unha das esixencias que a autoridade sanitaria establece para que as instalacións de Albarellos recuperen a súa actividade. 

Cada día que pasa, o número de concentrados diante das portas do consistorio local increméntase, tamén polas agradables temperaturas que se están a rexistrar. Pouco antes das dez da mañá comezan a chegar os primeiros participantes, algúns botan alí ata despois do mediodía. Hai quen incluso mellorou o sistema de fabricación sonora incorporando a esa particular sinfónica bidóns metálicos que permiten máis dun intérprete de xeito simultáneo. 

Contedor metálico a carón de centro de saúde de Albarellos (Monterrei). | FOTO: Noelia Caseiro.Contedor metálico que fará as veces de sala COVID do consultorio médico de Albarellos, en Monterrei. | FOTO: Noelia Caseiro. 

Tal e como así informaron dende a Área Sanitaria de Ourense, Verín e o Barco de Valdeorras, a "proposta do Concello de Monterrei de instalar unha estrutura provisional anexa ao consultorio que permita establecer un dobre circuíto foi valorada positivamente dende esta Xerencia", o que permitirá que se reabra o "consultorio garantindo, por enriba de todo, as condicións de seguridade para pacientes e profesionais".

Con todo, como así aseguraron nun comunicado feito público este mércores dende a plataforma de usuarios do centro de saúde de Albarellos, en Monterrei, as protestas non remitirán ata que non "se recuperen uns servizos sanitarios de calidade". 

Mantéñense as protestas a carón do contedor de obra que será a sala COVID do centro de...
comentarios