O Concello de Cualedro cerra as súas dependencias despois de detectarse un positivo de coronavirus. Un dos traballadores municipais, de 60 anos foi trasladado esta madrugada dende o Hospital de Verín ó de Ourense, debido a certas dificultades respiratorias; polo que nestes momentos está na UCI.
O resto de servizos que leva a cabo o Concello, a excepción daqueles que se prestan na consistorial, seguen funcionando.
O alcalde de Cualedro, Luciano Rivero, atópase confinado actualmente, tras recibir a chamada da muller do funcionario esta mañá, para avisalo do sucedido.
O Sergas citou hoxe pola tarde ós sete traballadores do Concello para facer as probas PCR pertinentes.
O rexedor sinalou que aínda que nestes momentos hai moi poucos casos na comarca "hai que seguir chamando á cidadanía, para que todos actúen con precaución e cumpran coas medidas de seguridade".
"No Concello todo o mundo garda as distancias, temos mamparas de seguridade, estamos coas mascarillas e temos os xeles, pero non vaia ser que poida haber outro caso; pero para evitar isto, xa estamos todos convocados para facer a PCR" alegou Rivero.
O primeiro edil di que hai que esperar os resultados, pero comunicou que os funcionarios que acudiron esta mañá ó Concello se atopaban perfectamente, xa que non se apreciaban síntomas de tose ou de febre.
Deste modo, e polo momento, Cualedro sube de un a dous positivos.