O Concello da Gudiña entregará 300 euros a todos os seus autónomos e pequenos empresarios afectados pola pandemia

O alcalde da Gudiña, o popular José María Lago, vén de confirmar una liña de axudas directas e sen moito máis trámite que a solicitude e a xustificación da caída nas vendas ou ingresos dos seus autónomos ou pequenos empresarios. 

O Concello adicará uns 15.000 euros -o un por cento do orzamento do municipio para o 2021- a esta bolsa de apoio económico inmediato a aquelas pequenas empresas e autónomos con domicilio fiscal no municipio que poidan acreditar unha caída de ingresos no seu nivel de facturación: "Quixeramos aportar moito máis, porque somos conscientes das necesidades, fundamentalmente do sector servizos, pero a nosa capacidade chega ata onde chega. É un pequeno gran de area máis que se poderá sumar ás axudas doutras administracións, coma as xa aprobadas polo Goberno autonómico de Núñez Feijóo", apuntou Lago Cabo. 

Nuns días coñecerase o procedemento para formular a solicitude, "que tentaremos simplificar ao máximo para que a tramitación administrativa sexa o máis áxil posible", sinalou o rexedor da Gudiña, José María Lago. 

No camiño doutros concellos

A Gudiña súmase así aos municipios, como os de Verín, Riós ou Oímbra, que xa habilitaron axudas directas para un determinado sector, como neste caso é o da hostalería. O último en anunciar un paquete de subvención a fondo perdido foi o de Riós, presidido polo tamén popular Francisco Armando Veiga Romero, que adicará un importe fixo de 600 euros.

A alcaldesa de Oímbra, Ana María Villarino, apoiou tamén aos seus hostaleiros cunha axuda directa equivalente ao recibo de autónomos dun mes e a tasa do lixo de todo o ano.