FOTOGALERÍA | A 54ª Festa da Androlla desborda Viana: 3.500 pezas do embutido rei para a maior mesa de Galicia

Non houbo sorpresas porque en Viana o éxito xa se dá por descontado, pero as cifras da 54ª edición da Festa da Androlla volven impoñer respecto. Este domingo, o pavillón vianés transformouse na maior mesa de Galicia para acoller a case 3.000 comensais, confirmando que o Entroido nesta comarca non só se vive co "fulión", senón que se saborea cunha potencia inigualable.

Un despregue gastronómico sen precedentes

Para dar de comer a semellante multitude, a loxística de Viana funcionou como un reloxo suízo. Sobre os pratos dos asistentes repartíronse as xoias da coroa do outono e inverno vianés:

• 3.500 androllas, o embutido rei que dá nome á cita.

• 3.500 chourizos para completar o menú tradicional.

• 200 cordeiros asados no seu punto.

• 1.500 botellas de viño para regar a xornada.

• 200 bicas, o broche de ouro doce que non pode faltar no sur de Ourense.

O epicentro do poder político e comarcal

A relevancia da cita non pasou desapercibida para os representantes públicos. Viana volveu ser, por un día, o epicentro político da provincia e da comunidade. Entre o balbordo dos folións e o aroma do cocido, destacou a presenza do conselleiro de Emprego da Xunta de Galicia, José González; o director xeral de Turismo, Xosé Merelles; o presidente da Deputación de Ourense, Luis Menor Pérez, e o delegado da Xunta en Ourense, Manuel Pardo Cid. 

Tamén esta o máximo responsable dos socialistas galegos, José Ramón Gómez Besteiro. 

Xunto a eles, unha nutrida representación de parlamentarios autonómicos e numerosos alcaldes da comarca que non quixeron perderse o gran escaparate do orgullo vianés.

Tradición que non toca teito

Esta 54ª edición deixa claro que a Festa da Androlla goza dunha saúde de ferro. Máis alá dos números, o que se viviu este domingo foi a reafirmación dunha identidade. Coa música dos folións resoando nas vigas do pavillón e o reencontro de veciños e visitantes, Viana do Bolo demostrou, un ano máis, por que o seu Entrudio e a súa gastronomía son Patrimonio de Interese Turístico, que con Vilariño de Conso e Manzaneda, veñen de acadar a categoría de Nacional.