FOTOGALERÍA | Xornadas de convivencia dos alumnados do Baronceli e o IES Monte Carrasco de Cangas

Alumnado do IES Castro de Baronceli participaba estes días nun intercambio con alumnado do Instituto Monte Carrasco de Cangas para fomentar o uso do galego. Unha enriquecedora iniciativa que promove a lingua galega e o coñecemento do patrimonio cultural e histórico das dúas localidades. 

O alumnado do Instituto Monte Carrasco visitaba Verín o pasado 18 de maio. Unha viaxe na que coñeceron o castelo de Monterrei, o patrimonio maila historia da vila do Támega e degustaron as augas de Cabreiroá nun encontro que favoreceu o intercambio de experiencias e coñecementos.

Esta semana foi a quenda do alumnado do IES Castro de Baronceli. Visitaron Cangas para descubrir algúns dos lugares máis singulares da localidade; cun percorrido que incluiu a fábrica Massó, o mirador da caracola en cabo Home ou o Facho de Donón. O xantar na praia de Menduíña permitiulles gozar dun baño e de actividades deportivas e antes de voltar cara Verín.

Ó longo das xornadas de convivencia, estudantes de ambos centros tiveron a oportunidade de coñecerse en persoa; logo de manter durante o curso comunicacións en galego a través do correo electrónico e as redes sociais. A iniciativa, promovida polos equipos de dinamización da lingua galega de ambos centros, xurdiu do instituto cangués, que escoulleu o centro de ensino de Verín pola alta porcentaxe de alumnado galegofalante.