FOTOGALERÍA | Ata Trump non quixo perderse o desfile do Entrudio da Gudiña

Ducias de ovellas; Astérix e Obélix; un anaquiño de ceo chegado do Canizo e moita, moita música -de folións convidados e da charanga Fuego- trouxeron ata á Gudiña ao mesmísimo Trump, que non quixo faltar á cita coa diversión que percorreu a principal estrada que cruza a vila na tarde do sábado. 

O Concello quixo trasladar publicamente o seu agradecemento á organización e a todos os colectivos participantes no Entrudio, destacando o papel fundamental desempeñado por Os Torgueiros, a Comisión O Carballal, A Pingarela, O Tarabustio, O Folión de Carracedo da Serra, O Folión do Tameirón e a Asociación de Mulleres Rurais Xestas e Toxos na dinamización dunha xornada marcada pola alta participación e pola posta en valor das tradicións locais.

Así mesmo, a administración local recoñeceu a colaboración do Folión de Fornelos de Filloás, así como a implicación das distintas carrozas, comparsas, veciños e veciñas que contribuíron ao desenvolvemento da celebración.

O Concello tamén salientou o labor de Protección Civil, dos GES e da Garda Civil, que garantiu a seguridade durante todo o evento. A xornada desenvolveuse nun ambiente festivo, caracterizado pola música, a cor e a ampla presenza de público.